1. En de Lacha patschat d’Krotta,
Mucka krabblet an der Wand,
Backena, du bisch d’s  schönste Städtle
weit ond breit em Schwobaland !

2. Stuagert, Ulm ond sonscht so Hefter
hent mei Herz no nia verlockt,
‚s isch ond bleibt halt’s allerbeste,
wenn dr Mensch in Backena hockt

3. Andere mögat d’Welt bereisa,
i für mi han oft scho denkt,
mir dät’s sicher nirgend gfalla
wos net recht nach Wildhäut stenkt

4. Ganget mer mit Asphaltpflaster,
 mit Zement und Plättla weg,
 nex goht über onsern schöna,
 weicha, dicka Stroßadreck

5. An de Gelder spannt’s a bissle,
aber des isch bloß für jetzt,
 weißlich hent mer scho vor Zeita
 von der Kirch’ da Turm versetzt

6. Überhaupt hent mir für Schulda
stets a oifachs Mittele g’hett
aus de Neue machmer alte
ond de Alte zahl mer net !

7. Wenn der Zink mit seine Gsella
blost vom Turm om d’ Mittagsstond,
plärrt vor Freid em ganza Städtle
Gans ond Gockel, Katz ond Hond.

8. Ja dia bloßet grad wiea d’Engel,
standet no net s’ bhäb drana,
d’ Hosaschnalla wernt sosnt roschtig
so greift dui Musik oin a!

9. Onser großer Dichter Schiller
wir net schlecht verwondert sei,
dass mer em hot’s Denkmal gsetzet
mitta en da Kiahdreck nei !

10. Mit dem Marbach, do am Neckar,
hot er’s au net gschickt verwischt,
den wird’s manchmal elend greiht han,
dass er net von Backena isch!

11. Desshalb freit mi’s donderschlechtig,
dass i selber hiasich be,
z’ Backena leb I, z’Backena sterb I,
z’Backena isch halt wonderschö